La femme de ménage... m'enfin!

So, mis prakti isch düre... isch guet gsi dasi das ha gmacht. mi lehrt eifach geng tuusig mau meh ir praxis aus us de büecher... bi iz aber auso scho ziemli k.o. ... u die standards, mit de ching dert i dere schueu umzga si ja (für mi persönlech) ou zum schreie gsi!!! isch aber ou es speziells vouk wo dert iri ching id schueu schickt (zbelgie chasch du d schueu säuber uswähle). gester isch ä bueb ir pouse zu üs cho u het gseit är heigi ä fläcke uf de hose. dr ferenc het gseit, z mammi wärdi de nid fröid ha wes dä müessi wäsche. dr bueb luegt ganz verdatteret u seit: z mueti schaffet dänk sicher nid, das isch d hushäutere!!! ...auso eher z gehobenere vouk...

übrigens hani ja iz mis ticket für uf amerika und d kali het grad sofort gschribe u gseit si chömi extra vo New York uf Montevideo für mi zgseh!!! :D isch das nid super? auso ja, i gloubes de ersch ganz wenis gseh, aber wär ja super toll!

pha, apropos amerika... dr mister conor mckeown, mi damalig fründ, isch verlobt! das isch irgendwie crazy... aber i mas dene beidne mega gönne! si si es guets päärli!

gester simer wider mau aui zäme furt. dr gilles und d julie hätte eiglech wider äs konzärt gha u dasmau heimer de würklech wöue luege dasmer rächtzitig si! aber es het du plötzlech gheisse das sig doch nid hüt u drum simer aui i park u hei ihne beidne dert zueglosst. isch mega gmüetlech gsi, u fasch wienes privatkonzärt! eifach super! bi eifach begeisteret, si es super duo! dr gilles spiut eifach mega guet gitarre u ar julie iri stimm hout eim eifach um! mega schön gsi!

so, müesse mau ga iichoufe... mir schlaue suissesses hei aui zäme zum znacht iiglade u hei vergässe, das hüt tag der arbeit isch u aues zue het... naja. iz geit d suechi los...

1 Kommentar 1.5.09 14:15, kommentieren

Werbung


Encore une qui reste...

Kei spezielle tag hüt... ha hüt 2 lektione gä im prakti. mega komisch, die lektion woni scho sit ewigkeite präpet ha isch vou id hose u die woni gester hurti ire haub stung ha häre gchlepft isch gange wie dür butter... naja. i schiine eifach nid dr typ z si für gross im vorus zplane. das ligt mir eifach nid.

hät eigentlech am nami no söue die letschte lektione für morn präpe, aber i ha hurti chli wöue ga lige u bi ersch wider am 10 vor 6i erwachet wo d doris het aglüte u gfragt woni sig... mir hei am 6i franzkurs... naja. ä nami für nüt. u i söt doch so dringend ga wösche! eh ja... drfür hani ja iz sicher vou viu energie für die ganzi nacht zbügle, yeah... *ironie*

aber morn isch dr letscht tag prakti. bi langsam aber sicher eifach nur no froh... das militärerle, umeschreie u beschtrafe i dere schueu ischmer eifach langsam zviu. das geit mir so gäge strich! drum bini de froh weni morn miner letschte 3 lektione düre ha.

auso, guet nacht!

1 Kommentar 29.4.09 22:57, kommentieren

Bla...

Hm, vilich bis ou ig gsi die letschte paar täg wo so völlig gnärvt bi gsi... hetmi eifach grad aus ufgregt... naja, so phasene gits u söus ou gä... vilich ischsi no nid mau düre, i weiss nid. aber hüt ischs scho viu besser gange. has uh guet gha mit dr doris u im prakti hanis eifach nid ami häre glah... isch zwar chli ä bazar gsi, aber eiglech hanimi guet gfüeut...

dr neu närvtmi iz scho (gsesch, isch glich noni düre...) är isch so mega vo sich überzügt u mues auso eifach aune unger d nase riibe wie guet daser doch isch... naja. mues ja nid beschti kollege wärde mit däm.

so, hüt nur churz, mues iz ganz lut ga musiglose u mi när wider hingers präppe mache... bonne soirée!

1 Kommentar 28.4.09 21:49, kommentieren

J'suis super fachée, moi!!!

Man, hüt isch wider mau nid guet! auso ja, het scho gester agfange. i ha ja scho vorgester mau gluegt für z ticket nach amerika zchoufe. has aber noni gmacht... u gester aabe woni ha gluegt ischs verdamtnomau 200 stutz tüürer!!! sone scheiss! aber ja, das isch nur gäud, isch schad, aber iz ischs haut so. i freuemi iz eiglech gliich henne, wüu mini gastfamilie sech ou so fröit. d marissa, mini gastschwoscht, hetmer hüt es mail gschribe... :D denn woni bi däne gsi isch si 4i gsi! i hase eifach immer no chli so in erinnerig, u iz schribtsimer scho mails! cool!

hüt hanimi aber no grad einisch meh ufgregt. dr tag isch eiglech guet gsi, ha usgschlafe, bi ga fitnesse, ha präpet u bi när i franzkurs am aabe. söt no erwähne dasi usserordentlech ha frei gha bim prakti... du hetis dr jody gschribe, si göngi aui zäme am aabe i park, machi äs füür u göngi dert chli ga sii. mir söui doch ou cho. he, i bi füür u flamme gsi, i liebes am aabe no chli use wes früehlig isch umes eifach cha gniesse! aber nei, d doris het öppis umegrännet wäge müed u so u de glich hetsi wöue dr jody gseh. eis huere hin u här, chasech eifach nid entscheide. u d tamar het umegrännet wenn si dert häre göng sig si eh alei wüu dr jody sicher nur mit dr doris redi, dr julien nur mit mir u dr gilles het ja iz ou ä fründin... man aber i ha ja mitem julien gredt u mitlerwile isch aus klar zwüsche üs. isch ganz normau und entspannt u es isch überhoupt nid so das nur immer mir würde zäme rede! aber wesi das so aus vorwurf bringt bi ig die wones schlächts gwüsse mues ha wenn sech d tamar alei söt füele a däm aabe. sorry, das muesi ächt nid ha! si machter drum das scho siteme zitli so ungerschwellig zum "vorwurf", aber i hamer das ja eifach ou nid usgläse... naja. du hani gseit i wöug nümme ga u bi hei. di angere zwo hei du plötzlech eiglech glich lust gha zga, wasi ja eiglech vo afang ah gwüsst ha, aber nei, mi mues zersch sones huere gschiis ga ablah... ehrlech. naja. isch eiglech überhoupt nüt schlimms gsi, aber si simer grad ufe geischt. has hüt eifach nid möge verputze. isch mitlerwile ou scho wider besser.

hüt abe isch drfür ä neue erasmus-studänt bi üser WG iizoge. ä sportlehrer vo frankriich. man het dä ä komische akzänt! mues mega lose, bimer iz haut "belgisch" gwanet...

so, mues mau is bett... morn gseht dwäut scho wider angers us!

28.4.09 00:05, kommentieren

La batte

Hüt isch sone nüt-machi-tag... si aui zäme a märit hüt mittag. auso d doris, tamar, gilles, jody, julien u ig. dä märit isch international bekannt wüuer so riiiisig immens isch! has zersch gar nid gloubt, aber hüt si mir tschirget u tschirget, u das het eifach nümme ufghört! mir hei mehrmaus ä kafipouse iigleit zwüschinne!! weder auso de "la batte" ghöret, de wär das dä riisig märit vo liège! isch übrigens jede (!) sunntig!

i gloub me chönnt ä ganzi serie dräie abe de stories vo üsere clique... ach, so viu drama, missverständnis u härzschmärz, isch ganz kitschig... mues mängisch lache, aber mir heis eifach mega guet zäme!

süsch simer das weekend wider mau sehr oft furt. hei sowou dr fritig wie ou samstig aabe im Far West verbracht im carré. dert ischs no gmüetlech, me cha sogar no mitenang rede!

ha mini stung im prakti leider noni gha... hei die ufe mäntig müesse verschiebe, isch grad zviu zdüe gsi. bi ja de gspannt ob die ateliers klappe...

hüt hani grad sone tag woni eifach nid wot franz rede... chami nid usdrücke, u zudäm hei dr julien u jody mi hüt die ganzi zyt korrigiert. das isch ja eiglech mega guet u si meines ja guet, aber weni sone luun ha de löschtmer z rede eifach grad ganz ab... auso ja, i has mega gnosse hüt, aber i ha de haut eher zueglosst aus die ganz zyt mi sänf drzue zgä... isch ja mängisch ou guet.

i hamer ja ä radio gchouft u lose iz geng weni doheime bi. u hüt heisi da so ä diskussionsrundi gha über zthema abtribig, auso no so rächt aspruchsvou, u i ha so öppis gnüschelet u chli zueglosst u ha plötzlech realisiert dasi eifach aus verstah! isch es cools gfüeu gsi! zeigt aber ou dasi immerno besser verstah aus rede... obwou, mi dünkts mega cool hei mir würkli mega viu kontakt mit belgier! wüu so hani scho viiiu me vortschrite gmacht weder weme geng mit ustuuschschüeler zäme isch. me chunnt eifahc meh id sprach irgendwie.

witers woti hüt mis ticket für uf amerika choufe. aber i ha müesse merke dasi das eifach scho sit langem usestüdele. hami du müesse frage wieso u ha gmerkt dasesmer grad chli viu wird eigentlech die reis ou no... d.h. i liebes hie in liège mitlerwile und wot eiglech noni as heiga dänke. aber angerersits, weni furt ga, de weti eiglech ufem diräktischte wäg hei! aber ja. i ha miner lüt zamerika ja scho sit ewigkeite nümme gseh, u weni mau dert bi ischs de sicher mega cool. eiglech weisis, aber isch glich grad so chli krass gsi zrealisiere...

so, gnue für hüt! mues wider chli ga nüt mache... oder präpe, je nach däm...

26.4.09 19:27, kommentieren

Ma première leçon

ha hüt mini erschti math-stung uf französisch gä! isch no so guet gange, überraschenderwiis... klar, kei meischter-stung, aber irgendwie hani plötzlech ganz vergässe dasi ja franz rede u bi eifach vou i mim elemänt gsi! :D isch irgendwie es mega cools gfüeu gsi! ömu so nächär wonis überhoupt ha realisiert! het gfägt! morn gits ateliers, was immer chli heiku isch vom "handling" här... weis noni ob das guet usechunnt ou si ça sera poutôt le bazar... hoffemer zbeschte!

1 Kommentar 23.4.09 22:36, kommentieren

La dispute

Grad mega gnärvt!!! tamar hetmi grad ufgregt, aber de würklech!!! hüt isch mini lehrere cho ichehocke bim prakti. si hetmer gseit wosi miner präp het agluegt, das die no meh is detail müesse ga. guet, chani mache. i bimers vor CH gwanet, das dr präp für mi dienlech und übersichtlech isch zum ungerrichte u die infos wo si no wet si bi üs aube ir planigsarbeit. aber guet, obi die ir arbeit oder im präp schribe isch mir ja glich... ufaufäu hani das de zwöi angere verzeut und d tamar het das auso überhoupt nid guet gfunge etc. drum hetsi grad ar Mme. Chevalier, üsere coordinatorin u betreuerin, gschribe. die widerum het es mail a AUI lehrer gschickt, das wägem bsuech i MIM prakti für üs eiglech nüt klar isch u das mir sozäges wider mau ä extrawurscht wei etc... man, huere siech!!! i stah iz eifach huere gschisse da!!! sone schiissi ehrlech! i ha genau NÜT drgäge gha das eso zmache, u iz bi eifach ig die wo so häregsteut wird aus würdsi vordüre friede-freude-eierkuchen u när hingerdüre zur chevalier ga gränne! gott im himu, ehrlech! huere sauer! das chasch doch eifach nid biete! die söu gfeligscht mi name usem spiu lah we si nid iiverstange isch mitem uftrag! hares ou grad gseit... huere sauer, ehrlech!

so, mues iz es paar mails ga schribe für das wider id gredi zbiege...

1 Kommentar 23.4.09 00:34, kommentieren